Алматыда демалыс күндері қоғамдық көлік жұмысын тоқтатады. Шектеу қала "қызыл аймақтан" шыққанша жалғасады

Қоғамдық көліктердің қозғалысына салынған тыйым мереке күндеріне де қолданылады. Тіпті Алматы "қызыл аймақтан" шыққанға дейін жалғаса береді. Қаланың бас санитар дәрігері Жандарбек Бекшиннің айтуынша, мұндай шектеулер өз тиімділігін көрсетіп үлгерген. Мәселен, өткен жұмада індет жұқтырғандардың саны 360 болса, сенбіде 342, жексенбіде 297-ге дейін төмендепті. Мамандар мұны қалада енгізілген кешенді шектеу шараларымен байланыстырады.

"Бұл жалпы қабылданған шараның арқасында қол жеткен нәтиеже. Жалпы қоғамдық көліктер инфекцияның таралу көздерінің бірі болып табылады. Біздің есеп бойынша, науқастардың 17,5%-ы коронавирусты қоғамдық көлікте жұқтырған. Оны науқастардың өздері де айтты", – деді Жандарбек Бекшин.

---

Оқи отырыңыз: Қазақстанда 59 мыңға жуық адамға коронавирусқа қарсы екпе салынды. Жүкті әйелдерді вакциналауға бола ма?

---

Жандарбек Бекшиннің мәлімдеуінше, ауруханалардағы науқас саны 300-ден төмендемейінше, шектеу шаралары осы күйінде қала береді. Ал індетке шалдыққандар саны артса, тіпті локдаун енгізілуі мүмкін. Қалалық мобильділік басқармасының өкілдері жұмыс күндері таңертеңгі және кешкі уақыттарда автобус санын ұлғайтуға уәде беріп отыр.

"Жұмыс күні таңертеңгі және кешкі уақытта жолаушы саны көп. Адам лық толмас үшін, автобус санын көбейтіп, резервтік құрамда тұрған қоғамдық көліктерді де жолаушы тасымалдауға шығарып жатырмыз", – деді Алматы мобильділік басқармасының өкілі Әсе Төлеуішов.

Айта кетсек, Алматыда 13 наурыздан бастап жаңа шектеулер күшіне енді. Соған сәйкес, демалыс күндері сауда орталықтары жабылып, қоғамдық көліктер жұмысын тоқтатты. Ал, тамақтану орындарына тек 20.00-ге дейін жұмыс істеуге болады.