Сауда және интеграция министрі Бақыт Сұлтанов коллегия отырысында шекара маңындағы аймақтарды дамыту – ішкі саудадағы басты әлеуеттердің бірі екенін айтты.

2030 жылға қарай Қазақстанның оңтүстігіндегі Алматы, Шымкент қалалары мен Жамбыл облысында тұрғындар саны айтарлықтай өседі. Мұндай үрдіс шекаралас Өзбекстан мен Қырғызстанның ірі агломерациялары – Ташкент пен Бішкек қалаларында да байқалады.

Оқи отырыңыз: Сауда министрі Қытайдан тауар импорты тоқтамағанын хабарлады

"2025 жылға дейінгі орта мерзімді келекшекте осы шағын өңірде көпшілік тұтынатын тауарларға сұраныс өседі деп күтіп отырмыз. Алматы мен Ташкент экономикалық белсенді және халық тығыз қоныстанған қалалар ретінде Орта Азиядағы негізгі сауда орталықтарына айналады", – деді Сауда және интеграция министрі.

Бақыт Сұлтановтың айтуынша, 2030 жылға қарай тұрғындарының саны 2,3 млн адамға жетеді деп болжанған республикалық маңызы бар үшінші қала – Шымкенттің географиялық тұрғыдан Ташкентке жақындығы да сауданы дамытуда маңызды рөл атқарады.

Министр осыған байланысты отандық тауар өндірушілердің сауда желілері мен өткізу нарығына қолжетімділігін арттыру бойынша жүйелі шаралар қолға алынатынын айтты. Қазіргі заманғы форматтағы сауда алаңдары ұлғайып, мобильді және биржалық сауда дамиды.