Премьер-министрдің орынбасары Бердібек Сапарбаевтың айтуынша, орта есеппен бір салымшыға есептегендегі зейнетақы жинағы бір миллион теңгені құрайды:

"Біздің есебіміз бойынша, орташа есеппен зейнетке шыққанда жақсы өмір сүру үшін есепшотта ең кемі 11-12 млн теңге болуы керек".

Бердібек Сапарбаев шиеленісіп кеткен әлеуметтік мәселелерге де тоқталды.

Оқи отырыңыз: Атаулы әлеуметтік көмекті алудың жаңа шарттары қандай?

"Әлеуметтік мәселердің ушығуы ең бірінші кезекте баға өсіміне қатысты болса, екіншіден, атаулы әлеуметтік көмекпен байланысты болды. Көмек алуға құжат тапсыру, табысты көрсету дұрыс жүзеге асырылмай, соның салдарынан 79 мыңға жуық қазақстандық атаулы әлеуметтік көмекті заңсыз алды. Көмектің аты да "әлеуметтік" қой, сондықтан ол шын мұқтаж отбасыларға берілуі керек. Ол үшін отбасының әрбір мүшесінің табысы дұрыс есептелуі қажет", – деді вице-премьер.

Үкімет мүшелері осы мәселелерді халыққа жете түсіндіру мақсатында еліміздің барлық өңірлерін екі рет аралап, халықпен кездесулер өткізгендерін айтты.

Оқи отырыңыз: Атаулы әлеуметтік көмек қандай жағдайда берілмейді?

"Көктемде 270, қазір 300-дей, жалпы 500-ден астам кездесу өткіздік. Мақсатымыз – көмек шарттарын халыққа түсіндіру болды. Ең үлкен мәселе – жерлестеріміз заңды, кей мемлекеттік бағдарламаларды білмейді, несиені қалай алып, жұмысқа орналасу тәртіптерінен де бейхабар", – деді Бердібек Сапарбаев.

Оқи отырыңыз: Атаулы әлеуметтік көмекке ілінбей қалғандар неге наразы болып жүр? Қандай қордаланған мәселе бар?

Баспана мәселесінде де тұрғындар арасында түсінбеушілік көп.

"Елорда тұрғындарымен кездескен кезде тұрғын үймен қамтамасыз етуге қатысты сұрақтар болды. Адамдар кезекте тұрмай-ақ баспаналы болғысы келеді. Бұлай болмайды. Біз құқықтық мемлекетте өмір сүреміз, тиісінше барлығы заңға сәйкес болуы керек. Ал заң баспананың кезекпен берілуін міндеттейді", – деді Бердібек Сапарбаев.

Оқи отырыңыз: 2020 жылы Тұрғынүйқұрылысжинақбанкінен кім үй ала алады?