Әлемдегі hi-tech компаниялардың хабарлауынша, 2025 жылы смартфондар әлемінде көптеген жаңалықтарға толы болады. Олардың алғашқылары қазірдің өзінде сатылымға шығып үлгерсе, жыл ішінде тұсаукесер рәсімін өткізуді жоспарлап отырған брендтер де аз емес. Соған орай, Информбюро порталы биыл көпшілікке таныстырылатын және сатылымға шығатын смартфондарға шолу жасады.

Huawei nova 13

Шолуды Қазақстанда сатылымы өткен аптада – 17 қаңтарда ғана басталған Huawei компаниясының жаңа смартфонынан бастағанды жөн көрдік. Олар – Huawei nova 13 және Huawei nova 13 Pro. 

Айта кетейік, Huawei – Қазақстан нарығына Қытай смартфонын әкелген алғашқы бренд. Компания 2016 жылы алғашқы nova смартфонын таныстырса, бүгінде оның сериясы 13-ке жетіп үлгерген. 

Жаңа смартфондардың артықшылығы – жасанды интеллектіге негізделген жаңа функциялармен толыққан. Бұл, әсіресе, фотосурет түсіруде көбірек кәдеге асады. Бренд бұл смартфондарында әдетте жиі кездесетін көз жұмып қалу не басқа жаққа қарап қалу сынды проблеманың шешімін тапқан. Мысалы, суретте көзіңіз жұмылып қалды делік, бұл жағдайда жасанды интеллектінің көмегімен осы фотосурет сериясындағы өзге суреттен сәтті шыққан бейнеңізді, яғни суреттің бір бөлшегін (мысалы, басыңызды) ауыстыруға болады. Бұл коллаж жасау не өңдеу арқылы «көзіңізді ашқаннан» әлдеқайда шынайы болмақ.

Сондай-ақ, смартфонның pro нұсқасында бір емес, екі бірдей селфи камера (50 және 8 мегапиксель) бар. Ал XD Portrait Engine жүйесі сізге суретіңізді қалауыңызша (шынайы, элегантты және стильді) түсіруге көмектеседі.

Техникалық ерекшеліктеріне тоқталсақ, бренд смартфондарын қуаттау уақытын тағы да қысқарта түскен. Енді nova 13 сериялы смартфондардың қуатын 50 пайызға жеткізу үшін бар болғаны 9 минут жеткілікті. Сондай-ақ, смартфонды шамадан тыс пайдаланған кезде оның қызып кетуінен сақтайтын ішкі қаптамамен де жабдықталған.

iPhone SE 4

Apple компаниясының ең қолжетімді жаңа буын смартфоны 2025 жылғы көктемде, яғни наурыз не сәуірде шығады.

iPhone SE 4 дизайны iPhone 14-тікі сияқты: 6,1 дюймдік OLED дисплеймен жабдықталады. Face ID технологиясы енгізіліп, Home батырмасы алынып тасталады. Негізгі камерасы – 48 Мп.

Бұл модель A18 чипімен және 8 ГБ жедел жадымен жабдықталатындықтан Apple Intelligence мүмкіндіктері қолжетімді болады. Қуаты – сағатына 3279 мА. Құрылғының бағасы шамамен 500 еуро болады деп күтіледі.

iPhone 17

Apple жыл сайын жаңа iPhone үлгілерін шығарғанымен айтарлықтай өзгерістер болмағаны үшін көпшіліктің сынына қалып жүр. Биыл да Apple жаңа үлгілер шығармақ және олар алдыңғыларынан әлдеқайда өзгеше болмақ. Экран астындағы Face ID, жетілдірілген алдыңғы камера және қуатты процессорлары болады деп адамдарды қызықтырып отыр. Air-дің корпусы жұқа және дизайны ерекше болмақ. Apple-дің эстетикаға негізделген және қолдануға ыңғайлы жеңіл моделі болады.

Apple кейінгі бес жылда алғаш рет алдыңғы камераны жетілдіріп, қазіргі 12 Мп сенсорды бес пластикалық линзамен 24 Мп сенсормен алты элементпен ауыстырады. Ал iPhone 17 Air смартфонының негізгі камерасы 48 Мп болады деп күтіледі. Оған қоса екі еселенген оптикалық зум бар. Екі модель де биыл қыркүйек айында сатылымға шығады деп жоспарланған. 

Samsung Galaxy S25

Samsung-тың 2025 жылғы негізгі флагмандық моделі – Samsung Galaxy S25 смартфоны. Дизайны – ультражіңішке, металл және сапалы әйнектен жасалған. Қара, күміс, жасыл және алтын түсте шығады деп күтіледі. Экраны – 6,7 дюйм. Негізгі камерасы – 200 Мп, алдыңғы камерасы – 16 Мп (автофокус функциясы бар). Қуаты – 5000 мАсағ, PowerShare функциясы бар.

Смартфон жады – 256 ГБ, 512 ГБ және 1 ТБ. Samsung Galaxy S25 моделі 2025 жылдың алғашқы жартысында сатылымға шығуы мүмкін. Өнімді жұмыс істеймін, фото және видеоға түсіремін деушілерге дизайны ерекше таптырмас смартфон. 

Ультра жіңішке дизайндағы Samsung Galaxy S25 Slim қалыңдығы шамамен – 6,4 мм. Негізгі камерасы – 200 Мп, ультракең бұрышты камерасы – 50 Мп және 3,5 есе оптикалық зумды 50 Мп телефото объективі бар. Процессоры – Snapdragon 8 Elite. Сонымен қатар 12 ГБ жедел жадымен жабдықталған. S25 Slim ультра жіңішке корпусының арқасында iPhone 17 Air-мен бәсекеге түседі. 

Samsung Galaxy Z Fold 7

Биыл Samsung Galaxy Z Fold 7 бүктелетін смартфоны да таныстырылады. Samsung бүктелу механизмін жетілдіріп, оны берік әрі аз байқалатындай етеді. Жаңа Flex Hinge технологиясы арқылы құрылғы жабық күйінде жұқа болады. Құрылғы су өткізбейді. Негізгі камерасы – 108 Мп, алдыңғы камерасы – 16 Мп. Қуаты 5000 мАсағ. Бұл смартфон да PowerShare функциясын қолдайды. Қаламмен жұмыс істеуге болады. Экранда бір уақытта 3 қосымшаны ашуға болады.

Samsung Galaxy Z Flip 7 бүктелетін смартфоны шағын және ықшам дизайнды ұнататындарға арналған. Бұл да су өткізбейді. Қара, ақ, күлгін және эксклюзивті жаңа түстерде шығады деп күтіледі. Негізгі камерасы – 50 Мп, алдыңғы камерасы – 10 МП (түнгі түсірілім жетілдірілген және автофокус бар).  Қуаты – 4000-4200 мАсағ. Смартфонды ашпай-ақ кейбір қосымшаларды іске қосуға болады. Бұл да тамызда Galaxy Z Fold7 үлгісімен бірге таныстырылады. 

Xiaomi 15 Ultra

Биыл ақпанда Xiaomi 15 Ultra флагмандық смартфоны таныстырылады. Xiaomi флагманы Snapdragon 8 Elite процессоры, 120 Гц LTPO OLED дисплейі және төрт камерамен жабдықталған. 16 ГБ жедел жады көп тапсырманы орындауға мүмкіндік береді. Негізгі камерасы – 200 Мп. 
Қуаты – 5450-5800 мАсағ, бұл смартфонды ұзақ уақыт пайдалануға жетеді. Шаң мен суға төзімді.

Xiaomi 15 Ultra – алдыңғы қатарлы технологияларды, жоғары өнімділікті және мобильді фотосурет мүмкіндіктерін іздегендерге арналған керемет таңдау.

Huawei Pocket 3

Huawei компаниясы Samsung Galaxy Z Flip 7 бүктелетін смартфонына бәсекелес ретінде Pocket 3 атты жаңа смартфон әзірлеп жатыр. Бұл құрылғы 2025 жылдың ақпан немесе наурыз айларында Қытайда таныстырылуы мүмкін. Pocket 3 алдыңғы Pocket 2 моделінен ықшамдау, жеңіл және жұқа болады деп күтіледі. 

Сипаттамасы: 6.94 дюймдік OLED дисплейі, 120 Гц жаңарту жиілігі, HiSilicon Kirin 9010 немесе Kirin 9000 процессоры, 16 ГБ дейінгі RAM және 1 ТБ дейінгі сақтау орны. Негізгі камерасы – 50 Мп. Қуаты – 4,520 мАсағ. Бұл смартфонның екі үлгісі шығады, бірақ олардың айырмашылығы туралы әзірге ақпарат жоқ.

Nothing Phone (3)

Nothing компаниясы 2025 жылдың бірінші жартысында үш смартфонды таныстыруды жоспарлап отыр: Nothing Phone (3), Nothing Phone (3) Pro және Nothing Phone (3) Plus. Nothing Phone (3) құрылғысының дизайны мен функциялары алдыңғы модельдерден ерекшеленіп, жоғары деңгейдегі мүмкіндіктерді ұсынады. Алдыңғы модельдердегідей, Nothing Phone (3) смартфонында айқын көрінетін артқы панель мен икемді жарықтандыру жүйесімен ерекшеленеді. Бұл жолы үш камералы жүйе мен жаңа Essential Glyph аймағы қосылады.

Экран өлшемі 6,5 дюймге дейін кішірейтілген, AMOLED дисплейі 120 Гц жаңарту жиілігі мен HDR10+ қолдауымен, ал құрылғы Qualcomm Snapdragon 7s Gen 3 процессорымен жабдықталған. Қуаты – 5000 мАсағ. 

Nothing Phone (3) Pro дисплейі үлкенірек. Ал Plus моделі туралы нақты ақпарат жоқ.