2025 жылға арналған жұлдыз жорамал: Астролог Әсел Тұрманованың болжамы
Астролог Әсел Тұрманова 2025 жылдың Юпитер мен Сатурн Суқұйғыш белгісінде кездескен айтулы өзгерістер болатын кезең екенін айтады. 2020 жылдан бері әлем қатты өзгеріп, сол кезде Суқұйғыш дәуірінің басталғаны туралы сөз қозғалған еді. Осы орайда жаңа дәуірде Қазақстанды және әр шоқжұлдыз иесін не күтіп тұрғанын астрологтан сұрап көрдік.
Астрологияда ел тәуелсіздік алғалы түзілетін "мемлекет жұлдызнамасы" деген ұғым бар. Басты ғаламшарлар мен олардың аспектілері жалпы мемлекеттің дамуына әсер ететін болады.
"Плутон Суқұйғыш бойымен жылжып, Қазақстанда ұзақ мерзімді саяси және әлеуметтік өзгерістер болады. Бұл – болашаққа бағытталған үкіметтік және әлеуметтік жүйеге жаңа идеялар енгізетін уақыт. Қазақстанда саяси жүйеде реформа жасау қажеттілігі туындайды, бұл үшін үкімет құрылымы мен басқару тәсілдерін өзгерту қажет болады. Сыртқы жағдайымыз да қатты өзгереді, әсіресе наурыз айын қалай өткеретінімізге назар аударуымыз қажет. Қазақстанның сыртқы серіктестері бізге аса тиімді емес шешімдер қабылдауға мәжбүрлеуі мүмкін. Әсіресе шетелдік серіктестермен байланыс орнату қиындайды. Сатурн Балықтарда тұрақтаған кезде Қазақстанға әлеуметтік, денсаулық саласындағы мәселелерді шешіп, әділеттік орнату қажет болады. Бұл кезеңде медицина, әлеуметтік қорғаныс, білім, психикалық денсаулық пен рухани дамуға назар аудару қажет. Балықтардағы Сатурн бұдан да әділеттірек қоғам орнату үшін асқан жауапкершілікті талап етеді. Мұнымен қатар Сатурнның Тоқтыға қарай жылжуы радикализацияны өршітуі мүмкін, адамдар дін мәселесіне келгенде сабырсыздық танытып, агрессия танытады. 2025 жылдың жазынан бастап, 2026 жылы бұл мәселе анық көрінеді", – деді астролог.
Әсел Тұрманованың айтуынша, Балықтардағы Сатурн 2024 жылы су тасқыны арқылы жағдайды ушықтырды. Сатурн Балықтар белгісінде болған кезде сумен байланысты қиындықтар туындайды. Өткендегідей көп жерді су алмаса да, келесі жылдың ортасына дейін осы мәселе көтеріле беретін болады.
Оқи отырыңыз: 2025 жылы қазақстандықтарды не күтіп тұр? Астролог болжамы
"Сатурн Тоқты белгісінде тұрақтаған кезде өртпен байланысты апаттар алып келеді. Сол себепті алдағы бірнеше жылда өрттен сақтану қажет. 2025 жылы Нептун мен Сатурн Тоқты белгісінде тұрақтағанда адамдардың көп нәрседен көңілі қалып, психикалық аурулары асқынуы мүмкін. 2025 жылы Уран Егіздер шоқжұлдызына қарай өтеді. Бұл маңызды астрологиялық оқиға. Коммуникация, жаңа технология және бұқаралық ақпарат құралдарында революциялық өзгерістер болады. Қазақстан цифрлық технологиялар, білім және ақпарат саласында жылдам өзгерістерге ұшырайды. Уран мемлекетті медиаплатформа мен цифрлық шешімдермен байланысты инновацияға алып келеді. Мұның барлығы елдің қаржылық жағдайына қатты әсер етеді. Бұдан бөлек сөз бостандығы, ашықтық және ақпарат қолжетімділігін қамтамасыз етуде жаңа тәсілдерге жүгіндіреді. Тәсіл жақсырақ болады деген сөз емес, бірақ өзгеріс болады. Уран Қазақстанды адам құқығы, БАҚ бостандығы мәселелерін шешуге, азаматтардың саясатқа белсенді араласуына итермелейді", – деді Әсел Тұрманова.
Сондай-ақ, Егіздердегі Юпитер коммуникация мен ақпараттық технологиялар тақырыбының өзекті болатынын көрсетеді. Қазақстан көрші мемлекеттермен байланысын нығайтып, технология, интернет-коммуникация және жаңа медиа саласын дамытуы мүмкін. Бұл уақыт ақпарат пен білім алмасуға арналған мәдени бағдарламаларды дамытатын кезең.
"Юпитер Шаян белгісіне өткен кезде ішкі қауіпсіздік, әлеуметтік тұрақтылық және азаматтардың қызығушылығын қорғау тақырыбы өзекті болады. Шаян отбасы, үй, білім және әлеуметтік реформалармен байланысты. Осы кезде Қазақстан ішкі мәселелерін – әлеуметтік қорғаныс, білім, денсаулық сақтау және отбасылық, мәдени құндылықтарды дәріптеу мәселелерін шешіп алса игі. Егер қысқаша айтатын болсақ, жаңа жылда Қазақстан келесі мәселелерін шешетін болады: Ақпараттық технология мен цифрлық трансформацияны күшейтеді. Сыртқы саясат пен білімге жол ашатын медиаплатформалар мен жаңа коммуникациялық технологияларды дамытады. Әлеуметтік реформалар жасап, ішкі мәселелерді шешеді. Қазақстан денсаулық сақтау, әлеуметтік қорғаныс және азаматтардың жай-күйі мәселесін реттеп алса болады. Саяси және әлеуметтік салаларда революциялық өзгерістер болады. Әсіресе, адам құқығы, саясат және әлеуметтік қиындықтарды шешуге технологияларды пайдалану үшін тиімді уақыт болады. Сондай-ақ, цифрлық әлемде бақылау күшейеді. Жалпы 2025 жыл Қазақстан үшін үлкен өзгерістер болатын уақыт", – деп қосты астролог.
Оқи отырыңыз: "Сюцай – нумерологияның бір түрі". ҚМДБ үкімі қандай?
Ары қарай Әсел Тұрманова әр шоқжұлдыз бойынша жұлдызнама ұсынып, оның жалпылама жасалғанына назар аударуды сұрады. Маманның айтуынша, тек арнайы жасалған жұлдызнама ғана адамды белгілі бір уақытта не күтіп тұрғанын айта алады.
2025 жылы алдағы бірнеше жылы жүзеге асатын оқиғалардың, өзгерістердің есігі ашылады. Жылдың бірінші жартысында табыс пен мүмкіндіктер нышаны Юпитер сізге демеу болады. Әсіресе шетелмен, шетелдіктермен байланысты оқиғалардың барлығы сәтті өтеді – бұл шетелге саяхат, білім болуы мүмкін. Өз мүмкіндігіңізді жіберіп алмаңыз – әсіресе айдың екінші және үшінші бөлігінде туғандар.
Жылдың екінші бөлігінде Уран жақындармен қарым-қатынаста өзгеріске алып келеді. Есесіне қаржылық жағдайыңыз жақсарады – соңғы жылдардағыдай қарыз деп қиналмайсыз.
Ұжымда немесе мақсаттастарыңыздың командасында үлкен өзгеріс болады. Жаңа достар тауып, интернетте бизнесіңізді дамытасыз. Өміріңізге Плутонның жағымды энергиясы басып кіреді. Сол себепті жаңа дүниелер жасайтын уақыт келді.
Денсаулығыңызға абай болыңыз – жыл ортасында Сатурнның сіздің белгіңізде тұрақтауы денсаулығыңызбен, өзіңізді түсінумен байланысты қиындықтар алып келуі мүмкін. Жалғыз қалуды, тыныштықты қалауыңыз мүмкін. Ең маңызды айлар – наурыз, сәуір және мамыр.
7 жыл бойы Торпақтарға күтпеген жайттар алып келген Уран Егіздерге қарай өтеді. Соңғы жылдары үлкен өзгерістерге ұшырасаңызда да, тыныштық тіпті түсіңізге кірмейді. Уран енді қаржылық жағдайыңыз бен денсаулығыңызға деген көзқарасыңызды өзгертеді. Бұдан өзге Плутон сіздің мансабыңыздың аумағына өтіп, сол жақты өзгертеді. Әсіресе бұл энергияны айдың басы мен соңында дүниеге келген Торпақтар қатты сезінетін болады.
Үлкен табыстың ғаламшары Юпитер сіздің жақтасыңыз болып, алда үлкен қолдау көрсетеді. Жақын достарыңыз, әріптестеріңіз бен әпке-бауырларыңыз өте жақсы көмектеседі. Тағы да оқуға түсуіңіз мүмкін. Артқа тартып тұратын Сатурн ғаламшары екінші жарты жылдықтан бастап сізге әсер етпейтін болады.
Жаңа хоббиіңіз қуаныш сыйлап қана қоймай, пайда да әкеледі. Сондай-ақ балалар, шығармашылық және қаржылай инвестиция қуантады. Маусым, шілде, қыркүйек сіз үшін маңызды айлар болады.
2025 жылы Егіздерде үлкен өзгерістер болып, жаңа мүмкіндіктерге жол ашылады. Әсіресе, жылдың екінші жартысынан бастап Уран ғаламшары әсер етіп, керемет өзгерістер болады. Имидж өзгертіп, айналаңыздағылар сізді басқаша қабылдай бастайды. Жаңашылдықты қалап, көп нәрсені басынан бастағыңыз келеді. Қаржы саласында табысқа жетесіз – жылдың екінші жартысында Юпитер оң әсер ететін болады.
Айналаңыздағылар сіздің қалай өзгергеніңізді байқайды. Сол себепті сіз имиджіңізді ғана емес, жаныңызда жүрген адамдарыңызды да өзгерткіңіз келуі мүмкін. Өміріңізге жаңа ұжым, таныстар мен жұмыс келеді немесе 2025 жылы осы туралы ойланасыз.
Энергияңыз көп болуы үшін, эмоциялық денсаулығыңызға назар аударып, спортпен шұғылданыңыз. 2025 жыл Егіздер үшін үлкен өзгерістер мен жеке трансформация дәуірі болмақ. Наурыз, шілде және қыркүйек айларында маңызды оқиғалар болады.
Шаяндар үшін жыл табысты болады, жылдың екінші бөлігінде барлығы сәтті өтеді – бұл үлкен табыстың ғаламшары сіздің шоқжұлдызыңызға келіп тұрақтаумен байланысты.
Ғаламнан тамаша тосынсыйлар алуға дайындалыңыз, дегенмен жылдың ортасында абай болыңыз – адамды шектейтін Сатурн ғаламшары Тоқты шоқжұлдызына қарай өтіп, сіздің әлеуметтік дәрежеңіз бен мансабыңызға өзгерістер алып келеді.
2025 жылдың алғашқы айларында қиналасыз, себебі Марс сіздің шоқжұлдызыңыз арқылы жылжып, қиындықтар туындатады – ары қарай не істеу керегін көп ойланып, наурызда жолыңыз ашылады.
Плутон сізге трансформация алып келеді. Ал кез келген трансформация Феникс секілді қайта тірілуден басталады. Жеке қарым-қатынасқа назар аударуыңыз қажет болады, қаншалықты берік екендеріңіз сынға түседі. Бұдан өзге денсаулығыңызда қиындықтар болады. Жаңа ем түрін қолданып, күн тәртібіңізді өзгерткіңіз келуі мүмкін – өзгерістер сәтті болуы керек. Сіз үшін ақпан, наурыз және мамыр айлары маңызды болмақ.
Жұбыңызбен қарым-қатынасыңыз бен қоғаммен байланысыңызда өзгеріс болады – Арыстандар үшін осы нәрсе өзекті болмақ. Сіздің неке мен ортақ міндеттерге деген көзқарасыңызды өзгертетін мықты жарды қалауыңыз мүмкін. Жаңа адамдармен танысасыз. Бұл қазір бар қарым-қатынасқа баға беретін уақыт.
Заманауи және технологиялық бірнәрсемен байланысты мақсаттарыңыздың командасында бизнес бастайсыз. Қарыз алумен байланысты жұмыстар сәтті өтеді – жұлдыздар несиені өтеу мен алуға көмектесуі мүмкін. Шетелдік жұмыстар бір жағынан өзекті болады, екінші жағынан сіздің бастан-аяқ араласуыңызды талап етеді. Сот істеріне келгенде абай болыңыз. Визаға құжаттар дайындаған кезде мұқият болыңыз, себебі шетелде оқып, жаңа білім алғыңыз келуі мүмкін. Қаржылық жағдайыңыз тұрақты болады, бірақ шығыстарды қадағалаған артық болмайды.
Жұмыс пен мансапта табысты болғыңыз келсе, аянбай еңбектенуіңізге тура келеді. Жаңа ұсыныстар бір жағынан қызықтырса, екінші жағынан сіз үшін нағыз сынға айналуы мүмкін. Қалай болғанда да бұл саланы өзгеріссіз қалдыру мүмкін болмайды. Сол себепті білек сыбана кірісіңіз. Сіз үшін наурыз, тамыз және қазан айлары өзгеріс алып келеді.
Бикештер екінші жыл қатарынан Сатурннан қысым көріп келеді. Биыл айдың соңғы бөлігінде туған Бикештерге қысым жасалады. Бұдан өзге биыл Бикештер қарым-қатынас пен келісім мәселесіне деген көзқарасын өзгертеді.
Ескі байланыстар үзіліп, жаңасы пайда болады. Ал қазір бар байланыс үлкен сынға шырайды. Уран мансапқа үлкен өзгерістер алып келеді. Өзіңізді басқаша тәсілмен дамытуыңыз мүмкін.
Юпитер де қуантады – айналысатын ісіңізді өзгерткен кезде жаңа мақсаттастар пайда болады. Ең бастысы – денсаулыңызға мән беріңіз. Сіз үшін наурыз, мамыр, қыркүйек маңызды айлар болмақ.
Махаббат пен балаларға қатысты өзгерістер – Плутон сіздің бесінші үйіңіздің бойымен жылжитындықтан, ұзақ уақыт өзгеріс болады. Сіздің Күніңізге жағымды әсер етіп, жұмыста табысқа кенелесіз. Бұған қоса үлкен табыстың ғаламшары Юпитер сіздің тоғызыншы үйіңізге жүріп келеді – шетелге сапарға аттанып, басқа мемлекеттердегі жұмысыңыз сәтті жүзеге асады.
Екінші жарты жылдықта мансапта үлкен өзгерістер болады, жаңа мүмкіндіктерге жолыңыз ашылады. Келісімшарт жасасатын қарым-қатынастарда қиындықтар туындайды. Жағымды ешнәрсе бермейтін қарым-қатынастан бас тартуға дайын болыңыз. Екінші жарты жылдықтан бастап, Уран күтпеген тосынсыйлар алып келеді. Қалай десек те ескінің барлығы өміріңізден кетіп, жаңаға орын босайды. Сіз үшін мамыр, шілде және қазан айлары табысты болмақ.
Айдың соңында туған Сарышаяндар Уранның қолайсыз әсері себебінен, ал айдың басында дүниеге келген Сарышаяндар Плутонның әсері себебінен өзгеріске ұшырайды. Сарышаяндардың өмірінде әлі де трансформация болып жатыр және әрбір сын оларды мықты етуде. Егер барлығын сараптайтын болсаңыз, мансапта мықты табысқа қол жеткізесіз.
Биыл денсаулық пен жалдамалы жұмысқа ерекше назар аударуыңыз керек болады. Жұмыс стилі өзгеріп, қағазбастылыққа ұрынуыңыз мүмкін. Ал денсаулық көптеген ауруды алдын алуды қажет етеді. Күн тәртібіңізді өзгертіңіз – оған спорт пен жаттығуларды енгізіңіз. Жылдың екінші жартысында Юпитер оң әсер етіп – алыс сапар мен өзге де өзгерістерге келгенде барынша қолдау білдіреді.
Отбасылық жұмыстарға мән беріңіз – тұратын жеріңізді ауыстырып, өз үйіңізде немесе әке-шешеңіздің үйінде жөндеу жұмыстарын жасауыңыз мүмкін. Жеке өмірде түбегейлі өзгерістер болады. Алайда Сарышаяндар маңызды адамды кездестіруі мүмкін. Сіз үшін ақпан, мамыр және қазан айлары маңызды болады.
Айдың соңында дүниеге келген Мергендерге Сатурн мен Юпитер қысым жасауы мүмкін – екіншісі жеке қарым-қатынасқа әсер етеді. Биыл жаңа адамдар келіп, таныстар мен достар саны артады.
Отбасылық өмірде өзгерістер жалғасады – жөндеу жұмыстары, көшу, жылжымайтын мүлік мәселесі әлі де өзекті болады. Қарыз алуға болады – банктер сізге несие береді, ай сайын төлемдерді уақытылы жабасыз. Әсіресе жылдың екінші бөлігінде серіктесіңіз ақшалай көмектеседі.
Жақындарыңыз қуантады – әріптестер, әпке-бауырлар, көршілер – олар мәселенің шешімін табуға көмектеседі. Жақын жерге саяхаттап, тағы бір оқуға түсуіңіз мүмкін. Жеке көлік сатып алу туралы ойлауыңыз мүмкін. Сіз үшін мамыр, шілде және желтоқсан айлары маңызды болады.
Тауешкілер жаңа белестерді бағындыруға сақадай сай. Плутон ақша табуға жаңа мүмкіндіктер ашады, табыс көздеріне назар аударыңыз.
Жылдың екінші жартысында үйдің үлкендері және жылжымайтын мүлікпен байланысты қиындықтар туындайды – Сатурн Тоқтыға қарай жылжып, жұлдызнаманың 4 ауласына өтеді. Бұл әсіресе айдың басында дүниеге келген Тауешкілерге әсер етеді. Қалай болғанда да үйде жөндеу жұмыстарын жасауыңыз немесе басқа жерге көшуіңіз қажет болады.
Юпитер мансапта жол ашады, алайда оның да өз қиындығы болуы мүмкін. Наурыз, мамыр, қазан айларында елеулі оқиғалар болады.
Суқұйғыштар жақын бірнеше жылдың басты ньюсмейкерлері. Үлкен трансформация планетасы сіздің өміріңізге еніп, үлкен өзгерістер алып келеді. Оның үстіне күтпеген оқиғалар ғаламшары Уран Егіздерге қарай өтіп, сіздің трансформацияңызды барынша қолдайды. Зерігіп қалмайтыныңызға уәде беремін. Әсіресе, айдың басында дүниеге келген Суқұйғыштар. Бар назарыңызды өзіңізге аударатын боласыз.
Юпитер жылдың екінші жартысынан бастап Шаяндарға қарай жылжиды – осының арқасында өзіңізді барынша жайлы сезінесіз, жұмыста мүмкіндіктерге жол ашылады. Суқұйғыштар идея мен бірегей тәсілдердің арқасында жаңа белестерді бағындырады. 2025 жыл Суқұйғыштар үшін жаңа идеялар мен мүмкіндіктер жылы. Күтініп, белсенді болуға тырысыңыз.
Жақындарыңызда өзгеріс болады – көршілер, әріптестер және әпке-бауырлар. Жүрген ортаңыз өзгеріп, жақын туыстарыңыздың ісіне араласуыңыз мүмкін. Шілде, тамыз және қараша айларында өзгерістер болады.
Балықтардың жеке басында үлкен өзгерістер болады. Соңғы жылдары Сатрунның әсерінен көптеген қиындықты бастан кешірдіңіз. 2025 жылы айдың соңында дүниеге келген Балықтарда қиындықтар болады.
Есесіне жылдың екінші жартысында Юпитер әсерінен жаңа мүмкіндіктерге жол ашылады, бұл балалар мен бизнес мәселесіне де қатысты. Қаржылық жағдайыңызға назар аударыңыз – Сатурн шығыстарды бақылауды талап етеді. Ішкі жан-дүниеңізге мән беріп, психология мен өзіңізді түсіну сұрақтарына келгенде жаңа бірнәрсені қолға алуыңыз мүмкін. Жаңадан, заманауи технологияларды қолданудан қорықпаңыз. 2025 жыл – үлкен процестер аяқталатын жыл. Жеке қызығушылықтарыңыз бен сүйіктіңізбен қарым-қатынаста трансформация болады. Наурыз, шілде және қыркүйек айлары маңызды болады.
Оқи отырыңыз: 2025 жылы зейнетақы, жәрдемақы және әлеуметтік төлемдер мөлшері қалай өзгереді