Үкімет қаулысымен Батыс Қазақстан облысындағы алапат су тасқынынан кейін әуедегі электр желілерін қалпына келтіру үшін төтенше резервінен 1,1 миллиард теңгеден астам қаражат бөлінді.

Бұл туралы Үкіметтің баспасөз қызметі хабарлады.

БҚО әкімдігі ҚР Энергетика министрлігіне 1 желтоқсанға дейін қаражаттың мақсатты пайдаланылғаны жөнінде есеп беруге тиіс.

Қалпына келтіру жұмыстары келесі учаскелерде жүргізіледі:

  • Бәйтерек ауданындағы Шалғай – Таловая;
  • Кеңтүбек (Григорьевка) – Бөрлі ауданындағы Александровка;
  • Шыңғырлау – Шыңғырлау ауданындағы Ащысай (Мырзагора).

Оқи отырыңыз: Үкімет резервінен 2,4 млрд теңге: Риддердің жылу желілері жөнделеді

Еске салайық, елімізде болған алапат су тасқыны салдарынан инженерлік, әлеуметтік инфрақұрылым және жолдар бүлінген болатын.

Атап айтқанда, 2,3 мыңнан астам электрмен жабдықтау тірегі қирап, 54 шақырым желі үзілген. Қазіргі таңда оның 40%-дан астамы қалпына келтірілді, жұмыс жаз айларында қарқынды жалғасып жатыр.

Сонымен қатар бұған дейін Қостанай облысында электр желілерін қалпына келтіруге төтенше резервінен 1,3 миллиард теңгеден астам қаражат бөлу туралы Үкімет қаулысы қабылданған болатын. Қалпына келтіру жұмыстары Арқалық қаласы, Амангелді және Жангелді аудандарын қамтиды.

Зардап шеккен азаматтарға келтірілген залалды өтеу және инфрақұрылымның барлық түрін қалпына келтіру мәселелері Үкіметтің қатаң бақылауында.