Түркістан облысында полицейлер үйдегі жерасты цехын анықтады, деп хабарлайды Polisia.kz.

Жедел-іздестіру іс-шаралары барысында полицейлер алкоголь өнімдерін заңсыз өндіру бойынша жерасты цехының қызметін тоқтатты. Қабылданған шаралардың нәтижесінде, жедел уәкілдер үйде заңсыз бизнес ұйымдастырған Сарыағаш ауданының тұрғынын ұстаған.

"Тінту кезінде қақпақтарды өңдеуге және штамптауға арналған аппарат, 300 бөтелке мөлшеріндегі дайын алкоголь өнімі, спирт-арақ сұйықтықтарын сақтауға арналған қақпақтар мен ыдыстар тәркіленді. Шығын шамамен 360 мың теңге болады", – делінген хабарламада.

Оқи отырыңыз: Сарыағашта көлік газ құбырына соғылып 7 мыңға тарта тұрғын газсыз қалды

Жерасты цехы аудан аумағында үш ай бойы жұмыс істеген, ал оның иесі Түркістан облысының екі ауданының сауда орындарында өнімді заңсыз өткізіп отырған. Осы факт бойынша барлық мән-жайды анықтауға бағытталған қажет іс-шаралар жүргізіліп жатыр.

Жиналған материалдар Түркістан облысы бойынша экономикалық тергеу департаментіне заңды шешім қабылдау үшін жолданған.