4 наурыз күні Қазақстанның көптеген өңірінде қолайсыз ауа райы күтіледі. Синоптиктер желдің күшеюі, жауын-шашын, көктайғақ пен тұманға байланысты дауылды ескерту жариялады.

Елдің шығыс және оңтүстік аймақтарында жел күшейіп, кей өңірлерде жаңбыр мен қар аралас жауын-шашын болжанып отыр.

Абай облысында желдің екпіні күндіз 15–20 м/с-қа дейін жетеді.

Алматы облысының оңтүстігі мен таулы аудандарында қатты жауын-шашын күтіледі. Солтүстігі мен таулы аумақтарында тұман түсіп, жолдарда көктайғақ болуы мүмкін. Алматы қаласында да тұман мен көктайғақ болжанса, Қонаевта желдің жылдамдығы 15–20 м/с-қа дейін күшейеді.

Түркістан облысында жаңбыр мен қар аралас жауын-шашын, таулы аудандарда көктайғақ пен жаяу бұрқасын күтіледі. Шымкент пен Түркістан қаласында жаңбыр жауып, тұман түседі.

Қарағанды облысы мен Ұлытау облысында да аралас жауын-шашын, көктайғақ және тұман болады.

Солтүстік Қазақстан облысы және Қостанай облысында қар мен бұрқасын күшейіп, желдің екпіні кей жерлерде 25 м/с-қа дейін жетеді.

Астанада жолдарда көктайғақ болып, күннің екінші жартысында жел 15–20 м/с-қа дейін күшейеді.

Оқи отырыңыз: Қазақстан қор биржасында доллар бағамы 3,54 теңгеге төмендеді

Маңғыстау облысы мен Ақтауда тұман түсіп, көктайғақ болуы ықтимал.

Батыс Қазақстан облысында жаңбыр мен қар, жаяу бұрқасын, тұман және көктайғақ күтіледі. Оралда желдің екпіні 15–20 м/с болады.

Синоптиктер жүргізушілер мен жаяу жүргіншілерге сақ болуды, ал алыс жолға шығатын азаматтарға ауа райының өзгерісін ескеруді ұсынады.