Сәуір айынан бастап қазақстандықтар кейбір мамандандырылған мамандарға терапевттің жолдамасынсыз жазыла алады. Мұның қалай болатынын Денсаулық сақтау вице-министрі Тимур Сұлтанғазиев түсіндірді.

Сенат отырысында журналистер науқас адам маманға тікелей хабарласу үшін не істеу керектігін сұрады.

"Әр емхананың өзіндік тетіктері, ақпараттық қосымшалары, түрлі медициналық ақпараттық жүйелері әзірленді. Сол арқылы онлайн немесе тіркеу бөлімі арқылы тіркелуге болады. Кейбір емханаларда әлі күнге дейін емханаға барып, кезекке тұру бар. Тиісінше, әрбір емхананың маманға жазылуға қатысты өз механизмі бар", – деді Тимур Сұлтанғазиев.

Оқи отырыңыз: Дәрігерге жолдамасыз қаралуға болады. Қазақстан емханаларын қандай өзгерістер күтіп тұр

Оның айтуынша, бұл жаңашылдық науқастар арасында дүрбелең тудырмайды, өйткені азаматтар нақты және объективті қажеттіліктері бар белгілі бір салаларға ғана тікелей жүгіне алады.

"Мысалы, тісіңіз ауырса, тіс дәрігеріне қаралу үшін терапевтке немесе жалпы тәжірибелік дәрігерге барудың қажеті жоқ. Тікелей тіс дәрігеріне баруға болады. Тағы бір мысал, жарақат алсаңыз, маманға тікелей баруға болады. Сәйкесінше, осындай объективті жағдайларда ғана жалпы тәжірибелік дәрігердің жолдамасынсыз маманға баруға рұқсат етіледі", – деп толықтырды министрдің орынбасары.