Риддердегі аурухана кешенінің құрылысын аяқтауға қайтарылған активтерден 28 млрд теңгеден астам қаражат бөлінді, деп хабарлайды Үкіметтің баспасөз қызметі.

Мемлекетке қайтарылған қаражаттан Риддер қаласындағы 200 орындық стационары мен бір ауысымда 500 адамды қабылдай алатын емханасы бар көпсалалы аурухана кешенінің құрылысын аяқтауға 28,2 млрд теңге бөлінді.

Үкімет 2021 жылы басталған аурухана кешенінің құрылысын аяқтау үшін қаражат бөлу туралы шешім қабылдады.

Жобаның жалпы құны – 34,8 млрд теңге, қазіргі уақытта 6,6 млрд теңге игерілді, оның ішінде 2 млрд теңге республикалық бюджеттен, 4,6 млрд теңге жергілікті бюджеттен бөлінген. Қалған қаражат арнаулы мемлекеттік қордан бөлінеді.

Аурухана кешенінің ашылуы демографиялық жүктемесі жоғары моноқала үшін өте маңызды. Риддердің халқы 55 мың адамды құрайды, оның 22,7%-ы – 60 жастан асқан тұғындар. Қаланың әр түкпіріндегі 12 ғимаратта орналасқан жалғыз аурухана кешенінің ғимараттары 80 жылдан астам уақыт бұрын салынған. Нысандар ескірген және қазіргі заманғы талаптарға сәйкес келмейді. Сонымен қатар халыққа шұғыл медициналық көмек көрсету үшін қосымша кардиологиялық, инсульттік, травматологиялық және күйік төсектерін ашу қажет.

Оқи отырыңыз: 2025 жылғы су тасқыны кезеңіне Үкіметтің дайындық деңгейі қандай

Жаңа көпсалалы кешеннің жалпы ауданы – 40 мың шаршы метр. Аурухана сараптамалық кластағы медициналық жабдықтармен жабдықталады. Мұнда 500-ден астам қызметкер жұмыс істейтін болады.

Бұған дейін қаражат Ақтөбе қаласында ерекше қажеттіліктері бар балаларға арналған арнайы балабақша, Ақмола облысы Зеренді ауылында спорт кешені, Түркістан облысы Темірлан ауылында музыка мектебі, Арқалық қаласында дарынды спортшы балаларға арналған спорт кешені, Астанада тірек-қимыл аппараты бұзылған балаларға арналған оңалту орталығы, Алматыда ерекше қажеттіліктері бар адамдарға арналған жаттығу орталығы құрылысына бағытталған болатын.