Шанхайда ғалымдар ауадан ішуге жарамды су өндіруге арналған әлемдегі алғашқы кешенді жасыл технологиялық шешімдер топтамасын таныстырды. Бұл жаңалық әсіресе су тапшылығы бар елдер мен өңірлер үшін тиімді болмақ, деп хабарлады ChinaDaily. 

Бұл жүйе Шанхай Цзяо Тун университетінің ғылыми-зерттеу жұмыстары негізінде жасалып, үш негізгі технологиялық бағытты қамтиды: конденсация, адсорбция және жылу сорғысын адсорбция мен абсорбциямен біріктірген гибридті әдіс. Олар әртүрлі климаттық жағдайлардағы су тапшылығын шешуге бейімделген: жоғары температура мен ылғалдылық, төмен температура мен ылғалдылық, сондай-ақ жоғары температура мен төмен ылғалдылық.

Зерттеу тобы бұл жаңалық Қытайдың атмосфералық суды өндіру саласында технологияны тұтынушыдан жетекші ойыншыға айналғанын білдіретінін атап өтті.

Ауадан су өндіру – ылғалды конденсациялау арқылы орталықтандырылмаған және жаңартылатын тұщы су көзін қалыптастыруға мүмкіндік береді. Бұл әсіресе жер асты суы тапшы немесе қалалық су жүйелері тұрақсыз өңірлер үшін маңызды.

QYResearch консалтингтік компаниясының мәліметінше, 2031 жылға қарай атмосфералық су өндіру нарығының көлемі 420 миллион долларға жетіп, алдағы жылдары жылдық өсім 4,8 пайызды құрайды.

Оқи отырыңыз: