2025 жылдың үшінші тоқсанында Қазақстандағы орташа айлық жалақы 429 368 теңгені құрап, өткен жылдың сәйкес кезеңімен салыстырғанда 10%-ға артты. Бұл туралы Ұлттық статистика бюросы хабарлады.

Медианалық жалақы – табыстардың "ортасын" көрсететін көрсеткіш – 302 584 теңге болды. Ал биылғы жылдың басынан бері ең төменгі жалақы 85 000 теңге деңгейінде белгіленген.

Ең жоғары жалақы өсімі тіркелген өңірлер:

  • Жетісу облысы – 18,1%,
  • Алматы қаласы – 15,9%,
  • Астана қаласы – 13%,
  • Павлодар облысы – 12,4%,
  • Ақмола облысы – 11,7%.

Салалар бойынша ең жоғары өсім байқалған:

  • Ақпарат және байланыс – 21,5%,
  • Ауыл, орман және балық шаруашылығы – 18,4%,
  • Көлік және қоймалау – 17,6%.
  • Өнеркәсіп саласында өсім 11% болды. 

Ең төмен өсім құрылыс (2,5%), денсаулық сақтау (5%), және қонақүй мен мейрамхана қызметі (6,2%) салаларында тіркелді.

Ең жоғары орташа жалақы келесі салаларда:

  • Тау-кен өндіру өнеркәсібі – 922 274 теңге (республикалық деңгейден 2,1 есе жоғары),
  • Қаржы және сақтандыру – 883 611 теңге,
  • Ақпараттық технологиялар мен байланыс – 818 114 теңге,
  • Кәсіби, ғылыми және техникалық қызмет – 637 570 теңге.

Ал ең төмен жалақы білім беру (290 891 теңге) және өнер мен ойын-сауық (305 088 теңге) салаларында тіркелді. 2025 жылдың үшінші тоқсанының соңында ел бойынша 63 871 бос жұмыс орны тіркелген. Бұл көрсеткіш өткен тоқсанмен салыстырғанда 1572-ге көп.

Оқи отырыңыз: Қазақстанда ерлер мен әйелдердің жалақысы неге тең емес? Инфографика

Ең көп бос орындар:

  • Өнеркәсіп саласында – 28,9%,
  • Мемлекеттік басқару және қорғаныс саласында – 15,5%,
  • Саудада – 10,6%.

Өңірлер бойынша көшбасшылар:

  • Алматы қаласы – 15 471 вакансия,
  • Астана – 7 550,
  • Павлодар облысы – 6 800.

Деректер 1-Т "Еңбек туралы есеп" статистикалық нысаны негізінде ірі, орта және шағын кәсіпорындар (микробизнес қоспағанда) бойынша жиналған.