1 желтоқсандағы жағдай бойынша Қазақстанда атаулы әлеуметтік көмек (АӘК) 54 мың отбасындағы 290,6 мың адамға тағайындалды. Төленген қаражаттың жалпы көлемі 30,3 млрд теңгені құрады. Бұл туралы Еңбек және халықты әлеуметтік қорғау министрлігі хабарлады.

Ведомство мәліметінше, 2025 жылы атаулы әлеуметтік көмекті қаржыландыруға республикалық бюджеттен 98,4 млрд теңге қарастырылған.

АӘК-тің негізгі мақсаты – ақшалай қолдау көрсету арқылы азаматтардың әл-ауқатын жақсарту және отбасының еңбекке қабілетті мүшелерін жұмыспен қамтудың белсенді шараларына тарту арқылы қиын өмірлік жағдайдан шығару.

Бағдарлама аясында:

  • табысы кедейлік шегінен аспайтын азаматтарға тоқсан сайын әлеуметтік көмек тағайындалады;
  • табысы аз отбасылардағы 1 жастан 6 жасқа дейінгі әр балаға ай сайын 1,5 айлық есептік көрсеткіш (АЕК) мөлшерінде қосымша төлем беріледі.

Оқи отырыңыз: 2026 жылғы қаңтарда Қазақстан азаматтары неше күн демалады

2025 жылғы 1 желтоқсандағы дерек бойынша, АӘК алушы отбасылардағы мектеп жасына дейінгі 90,5 мың балаға 3,7 млрд теңге көлемінде қосымша төлем тағайындалған.

Сонымен қатар бағдарлама жұмысқа орналастыру, кәсіп ашуға гранттар беру, біліктілікті арттыру курстарына жіберу және өзге де шаралар арқылы отбасыларды жұмыспен қамтуға жәрдемдесуді көздейді. Қазіргі уақытта қазақстандықтар атаулы әлеуметтік көмек тағайындауға өтінішті тұрғылықты жері бойынша мансап орталықтарына, ауылдық округ әкімдіктеріне немесе egov.kz электрондық үкімет порталы арқылы бере алады.