Қазақстанда заңсыз жұмыс істеп жүрген Қытайдың 26 азаматы елден қуылды. 

Сарысу аудандық сотында Қытай Халық Республикасының 26 азаматына қатысты ӘҚБтК-нің  517-б. 5-б (Шетелдiктiң немесе азаматтығы жоқ адамның ҚР халықтың көші-қоны саласындағы заңнамасын бұзуы) бойынша әкімшілік құқық бұзушылық туралы істер қаралды.

2024 жылғы қыркүйек айында ҚХР азаматтары тиісті рұқсат алмай, салынып жатқан зауыттың аумағында жұмыс істеген.

Оқи отырыңыз: Алматы облысында көші-қон заңнамасын бұзған 50 шетел азаматы елден шығарылды

Сотта құқық бұзушылар кінәларын мойындамай, бірі турист ретінде келгенін, ал бірі жұмыс іздеу мақсатында келгенін айтып көрсеткен.

"ҚР рұқсатсыз еңбек қызметін жүзеге асыру фактісі әкімшілік құқық бұзушылық туралы хаттамалармен, сонымен қатар іс бойынша жиналған материалдарымен расталды. Сот қаулыларымен ҚХР азаматтары ӘҚБтК-нің  517-б. 5-б. бойынша кінәлі деп танылып, олар ҚР шегiнен әкімшілік жолмен шығарылды. Қаулылар заңды күшіне енді", – делінген Жамбыл облыстық соты таратқан хабарламада.