Петропавл тұрғыны Александр Рябуханы жергілікті әкімдік қызметкерлері баспанаға мұқтаждар кезегінен алып тастаған. Мұның себебін анықтау кезінде ол өзінің құжат бойынша марқұмдар қатарында екенін білген, деп хабарлады 31 арнаның Информбюро ақпараттық бағдарламасы.

Александр Рябуха сегіз жасында жетім қалып, балалар үйінде тәрбиеленген. Төрт жыл бұрын ата-ана қамқорынсыз қалған адам ретінде баспана кезегіне тұрыпты. Енді соңғы бір аптадан бері өзінің тірі екенін дәлелдей алмай келеді.

"Мен бұл мәселені бейбіт жолмен шешкім келді. Бірақ, менің мәселеме ешкім назар аударғысы келмеді. Үндемей жүрсе, пәтер кезегінен алып тастаймыз деген болар", – дейді Александр Рябуха.

Жергілікті әкімдік мамандары мұндай қателіктің неден туындағанын жедел анықтауға уәде етіп отыр.  

"Қателіктің екі себебі болуы мүмкін. Не миграциялық полиция оны тіркеуі бойынша таба алмаған не АХАЖ қызметкерлері оны таба алмай, өлгендер қатарына қосқан", – деді Петропавл қаласы ішкі саясат бөлімінің басшысы Азат Ибраев.

Александр мәселені дереу шешіп бермеген әкімдік қызметкерлеріне қатысты прокуратураға арыз түсірген.

Материалдың толық нұсқасын төмендегі видеодан көріңіз: