Өскемен қаласында магистральді су құбыры жарылып, салдарынан бірқатар шағынаудандарда ауызсу беру уақытша тоқтатылды.

Апат Беспалов көшесінің маңында тіркелген. Мамандардың мәліметінше, диаметрі 400 миллиметр болатын негізгі су желісі зақымданған. Соның салдарынан қаладағы бірнеше аумақ толықтай сусыз қалған. Қазіргі уақытта Мирный кенті мен оған іргелес аудандарда ауызсу жоқ. Атап айтқанда, Севастопольская, Виноградов, Микоян, Карбышев көшелерінің тұрғындары, сондай-ақ Назарбаев даңғылы бойындағы үйлер су тапшылығына тап болды.

Жеке сектор тұрғындары ауа райының күрт суытуына байланысты алаңдаушылық білдіріп жатыр. Олардың айтуынша, аяз күшейсе, құбырлар қатып, жағдай одан әрі ушығуы мүмкін.

Оқи отырыңыз: Алматыда су құбыры желілерін қайта құруға байланысты су беру уақытша тоқтатылады

Оқиға орнына жедел түрде жөндеу бригадалары жіберіліп, апатты қалпына келтіру жұмыстары жүргізіліп жатыр. Алайда су қашан толық қалпына келетіні әзірге нақтыланбады.

"Өскемен Водоканал" кәсіпорны тұрғындарды ауызсумен қамтамасыз ету үшін уақытша су тасымалдау ұйымдастырылғанын хабарлады.