Оқу-ағарту министрі оқушылардың сабақта телефон ұстауын шектейтін бұйрық шығармақ. Бұйрық жобасы Ашық НҚА порталында жарияланды.

Бұйрық жобасында орта білім беру ұйымдары қызметінiң үлгілік қағидаларын балалардың өмірі мен денсаулығы үшін педагогтер мен ата-аналардың жауапкершілігін жүктеу туралы тармақтармен толықтыру көзделген.

"Мұғалімнің шешімі бойынша сабақта оларды қолдану қажеттілігін есепке алмағанда, білім алушылар мен педагогтар сабақтарда мобильді байланыс құралдарын пайдаланбайды", – деп жазылған жобада.

Оқи отырыңыз: Kundelik-те оқушы бағасы қалай есептеледі? Ата-анаға арналған нұсқаулық

Сонымен қатар, құжатта білім беру ұйымынан тыс болған кезде оқушының өмірі мен қауіпсіздігі үшін ата-аналары немесе өзге де заңды өкілдері жауапты болатыны жазылған. Яғни, сабаққа дейін, сабақтан кейін, демалыс уақытында балаларға қатысты жауапкершілік ата-аналарға немесе заңды өкілдерге жүктеледі. Бұл баланың өмірі мен қауіпсіздігі үшін мектептің жауапкершілігінің шекарасын анықтау мақсатында енгізілгелі отыр.

Сондай-ақ, құжат жобасына сәйкес, теріс қылықтар жасаған, мектептің ішкі тәртіп қағидалары талаптарын бұзған оқушыны сабақтардан шеттетуге, сондай-ақ ата-анасының немесе өзге де заңды өкілдерінің қасында еріп жүруінсіз білім беру ұйымынан шығаруға жол берілмейді. Білім беру ұйымы қажет болған жағдайда ата-аналарды немесе өзге де заңды өкілдерді мектепке шақырып, болған жағдай туралы хабардар етеді және тиісті шаралар қабылдайды.