Павлодар облысы Екібастұз ГРЭС-1 аумағынан майнинг дата-орталықтары табылды, деп хабарлайды қаржы мониторингі агенттігі.

Агенттіктің аймақтық департаменті электр энергиясын тиісті лицензиясыз сатқан кәсіпкерлердің заңсыз әрекетін әшкереледі.

"Екібастұз ГРЭС-1 аумағында орналасқан майнинг дата-орталықтарының үздіксіз жұмыс істеуі мақсатында пайдаланылатын электр энергиясын заңсыз тұтыну және сату ұйымдастырылған. Бұл ретте электр энергиясы жеке ЖШС-ға екі кәсіпорынның атынан келіп түсіп отырған", – деп хабарлады ҚМА.

ЖШС-ның электр энергиясын өткізуге лицензиясы болмаған.

"Өз кезегінде бұл ЖШС электр энергиясын өндірістік қажеттіліктер үшін өндіруші ұйым болып табылатын ЕГРЭС-1-ден сатып алған. Алдын ала актіге сәйкес, белгіленген табыс сомасы 805 млн теңгені құрады", – деп толықтырды ведомстводан.

Істі тергеу жалғасып жатыр. Өзге ақпарат тергеу мүддесінде жария етілмейді.

Энергетика министрлігі бұрын "сұр" кеншілерді анықтау неге қиын болғанын айтты. Вице-министр Жандос Нұрмағанбетовтың сөзінше, энергия беруші және энергияны өткізетін компаниялар олардың орналасқан жері туралы ақпарат бермейді.

"Мұнда түсіну керек: не олар білмейді, не бұл ақпарат жасырылады. Мұны анықтау қажет", – деп толықтырды вице-министр.