Астана қаласында Әзербайжан президенті Ильхам Әлиевтің Қазақстанға сапары аясында ашылған Гейдар Әлиев көшесінің бойына егілген шырша ағаштары қайта қазылып алынды. Бұл әлеуметтік желі қолданушыларының түсінбеушілігін туғызған болатын.

Осыған орай, Астана қаласы Есіл ауданы әкімінің орынбасары Дәрменияр Қыдырбекұлы неліктен бес шырша ағашының қайта қазылғанын түсіндірді.

Оның айтуынша, шырша көшеттері отырғызылғаннан кейін агрономдар оларды қылқан жапырақты ағаштардың өсуіне әлдеқайда қолайлы орынға – Ботаникалық баққа қайта отырғызуға ұсыныс берген. Осыған орай, шыршалар Ботаникалық бақтағы Әзербайжан президенті отырғызған ағаштан 100 метр жерге ауыстырылған.

Ал Бұқар жырау көшесінің Гейдар Әлиев көшесімен қиылысқан тұсына, яғни қазылып алынған шыршалардың орнына жөке мен арша көшеттері отырғызылған.

Оқи отырыңыз: Улица имени Гейдара Алиева появилась в Астане

Еске салайық, Әзербайжан басшысы Ильхам Әлиев Қазақстанға 10 сәуірде келіп, Астана қаласында Гейдар Әлиев атындағы көшенің ашылу салтанатына қатысты.