Қазақстанда электр самокаттарды пайдалануды реттеудің жаңа кезеңі басталды. Қазақстан Республикасының Ішкі істер министрлігі жалға берілетін электр самокаттарын ресми есепке алу және оларға сәйкестендіру нөмірлерін беру тәртібін бекітті.

Жаңа талаптар жеке тұлғаларға емес, электросамокаттарды жалға берумен айналысатын компаниялар мен кәсіпкерлерге қатысты. Енді операторлар әр самокатқа арнайы "төлқұжат" жасап, оның техникалық жағдайы, жөндеу тарихы және сериялық нөмірі туралы мәліметті тіркеуге міндетті болады.

Әр самокатқа бірегей сәйкестендіру нөмірі беріледі. Ол екі бөліктен тұрады:

  • әріптік код – компания өзіне тән бір латын әрпін таңдайды және ол бүкіл паркке ортақ болады;
  • сандық белгі – әріптен кейін "00001"-ден басталатын бес таңбалы сан қойылады.

Егер самокат қолданыстан шығарылса, оның нөмірі қайта пайдаланылмайды. Яғни жаңа техникаға бұрынғы нөмірді беру тыйым салынады.

Нөмір тәртіп сақшылары мен бейнебақылау камераларына анық көрінуі үшін самокаттың үш жеріне жапсырылады: артқы дөңгелектің қорғанышына және рөл бағанасының екі жағына.

Екі компания бір әріпті таңдаған жағдайда мәселе келіссөз арқылы шешіледі. Компания таңдаған әрпі туралы басқа операторларға хабарлама жібереді. Егер 5 күн ішінде қарсылық болмаса, бұл әріп ресми түрде сол операторға бекітіледі.

Жаңа талаптар 2026 жылғы 1 шілдеден бастап күшіне енеді. Осы уақытқа дейін жалға беруші компаниялар барлық электр самокаттарын жаңа стандартқа сәйкес таңбалап үлгеруге тиіс.

Айта кетейік, соңғы уақытта электр самокаттарға байланысты тұрғындардың шағымы көбейген. Әсіресе самокат мінгендердің жаяу жүргіншілерді қағып кету оқиғалары жиілеп отыр.

Оқи отырыңыз: Ереже бұзған самокатшыларға айыппұл салу жол қауіпсіздігіне қалай әсер етті