Қазақстан Республикасы Ұлттық экономика министрлігі еліміздегі моноқалалар тізбесін жаңартып, Екібастұз қаласын ресми түрде тізімнен шығарды, деп хабарлайды министрлік. 

Министрліктің мәліметінше, бұл шешім 2026 жылғы 10 наурыздағы бұйрық негізінде қабылданған. Оған қаланың экономиканы табысты әртараптандыруы себеп болған.

Ведомство 78 негізгі көрсеткіш бойынша моноқалалардың әлеуметтік-экономикалық дамуына кешенді талдау жүргізген. Нәтижесінде Екібастұздың монопрофильді модельден біртіндеп шығып, тұрақты даму жолына түскені анықталған.

"Қала экономикасы бүгінде теңдестірілген салалық құрылыммен, өнеркәсіптің тұрақты өсімімен және жоғары инвестициялық белсенділікпен сипатталады. Екібастұз еліміздің энергетика және металлургия саласында маңызды өнеркәсіп орталығы саналады", – делінген хабарламада.

Оқи отырыңыз: Екібастұзда қолдан жасалған алкоголь өндіретін жасырын цех анықталды

2025 жылдың қорытындысы бойынша:

  • өнеркәсіп өндірісінің көлемі – 1 629,4 млрд теңге (+28,1%)
  • негізгі капиталға инвестиция – 429,8 млрд теңге (1,2 есе өсім)

Жаңартылған бұйрықпен 19 моноқаланың тізбесі бекітілді: Абай, Ақсай, Ақсу, Алтай, Балқаш, Жаңаөзен, Жітіқара, Лисаковск, Қаражал, Кентау, Құлсары, Курчатов, Риддер, Рудный, Сәтбаев, Степногорск, Теміртау, Шахтинск және Хромтау. Осылайша, елдегі моноқала саны 20-дан 19-ға дейін қысқарды.

Министрлік өкілдері Екібастұзды тізімнен шығару – қаланың экономикалық трансформациясы сәтті жүзеге асқанын көрсететін маңызды көрсеткіш екенін атап өтті.