29 ақпаннан 1 наурызға қараған түні бірыңғай уақыт белдеуіне көшуге байланысты кейбір порталдар мен қызметтер қазақстандықтар үшін уақытша қолжетімсіз болады.

Атап айтқанда, 29 ақпан сағат 23.00-ден 1 наурыз 2.00-ге дейін Бірыңғай жинақтаушы зейнетақы қоры порталында техникалық жұмыстар жүргізіледі. Қазіргі уақытта қордың веб-қызметтерінің жұмысында қысқа мерзімді үзілістер болуы мүмкін.

29 ақпан күні сағат 22.00-ден 1 наурызда сағат 1.00-ге дейін "Төрелік" АААЖ, сот кеңсесі, Жоғарғы Соттың ресми сайты, сот актілерінің банкі, сот істерін іздеу, сот істерін қарау кестелері де қолжетімді болмайды.

29 ақпан сағат 23.30-дан 1 наурыз 7.00-ге дейін Мемлекеттік кірістер комитетінің ақпараттық жүйелерінде техникалық жұмыстар жүргізіледі. Осы уақыт ішінде мемлекеттік кірістер комитетінің қызметтері қолжетімсіз болады.

29 ақпан сағат 22.00-ден 1 наурыз 2.00-ге дейін eGov.kz сайтында техникалық жұмыстар жүргізіледі. Осы уақыт ішінде келесі қызметтер де қолжетімсіз болады:

  • eGov.kz порталы және оның құрамдас бөліктері;
  • egov mobile мобильді қосымшасы;
  • "Е-нотариат" бірыңғай нотариаттық ақпараттық жүйесі;
  • "Техникалық бақылау" бірыңғай ақпараттық жүйесі;
  • e-Otinish электронды өтініш қызметі;

"Ұлттық ақпараттық технологиялар" АҚ қолдау көрсететін басқа да ақпараттық жүйелер мен мемлекеттік деректер базалары.

Қазақстандық банктер де жүргізіліп жатқан техникалық жұмыстар туралы хабарлады. Кейбір қызметтер, терминалдар мен банкоматтар уақытша қолжетімсіз болуы мүмкін, бірақ қазақстандықтар төлем жасай алады.

Оқи отырыңыз: Бір уақыт белдеуі: 1 наурызда жұмыстан кешікпес үшін не істеу керек

Байланыс операторлары мобильді қосымшаларындағы "Жеке кабинет" түні бойы қолжетімсіз болуы мүмкін екенін түсіндірді.