–Орталық-Оңтүстік дәлізіне жататын республикалық маңызы бар Астана-Алматы күре жолының құрылысы аяқталуға жақын, деп хабарлады Көлік министрлігі.

Құрылыс жұмыстары аясында Қарағанды-Балқаш, Балқаш-Бұрылбайтал, Бұрылбайтал-Күрті және Шамалған станциясының айналма жолы жобалары жүзеге асып жатыр. Бұл жолдың жалпы ұзындығы – 946 шақырым.

Көлік министрі Марат Қарабаев құрылыс жұмыстары жүріп жатқан жол учаскелерінің басына барып, жауапты мердігер ұйымдардың өкілдерімен кездескен.

"Астана мен Алматы арасындағы жолдың құрылыс сапасын кореялық Dongsung Engineering және ISAN Corporation компаниялары бақылауға алды. Компания инженерлері техникалық қадағалауды жүргізіп, үнемі құрылыс басында", – делінген хабарламада.

Баспасөз қызметінің мәліметінше, учаскелердің бір бөлігі жаздың ортасынан бастап қолданысқа берілсе, қалған бөлігі 2024 жылдың соңына дейін халық игілігіне тапсырылады.

Оқи отырыңыз: Үкімет басшысы экономиканың өсуіне кедергі келтіру мүмкін факторларды атады

"Мәселен, жалпы ұзындығы 363 шақырым Қарағанды-Балқаш күре жолының бойында айналма жолдар мүлдем қалған жоқ. Жоба аясында 11 көпір, ауыл шаруашылығы техникасының өтуі үшін арналған 32 жол өтпесі, көлік айрығы және темір жол арқылы өтетін жол өтпесінің құрылысы толық аяқталған. Қазір абаттандыру жұмыстары жүргізіліп жатыр. Сонымен қатар жолшылар асфальттың жоғарғы қабатын төсеп, жол қозғалысы қауіпсіздігін қамтамасыз ету үшін арнайы тосқауыл қоршауларын орнатып жатыр. Нысанды 2024 жылғы қазан айында пайдалануға беру көзделіп отыр. Былтыр мамандар Балқаш-Бұрылбайтал күре жолының жалпы ұзындығы 127 шақырым үш учаскесін пайдалануға тапсырды. Биыл қалған үш учаске қолданысқа беріледі", – делінген хабарламада. 

Жалпы ұзындығы 81 шақырым Күрті-Бұрылбайтал жолы биыл жазда тапсырылады. Қазір мамандар жол бойында абаттандыру жұмыстарын жүргізіп жатыр. Сонымен қатар биыл жазда Шамалған бекетінің айналма жолы да қолданысқа берілмек.

Жоғарыда аталған жол учаскелері I-б техникалық санатына сәйкес төрт жолақты болады.