Қазақстанның ең жарқын әрі ең беделді опера әншілерінің бірі Майра Мұхамедқызы сахнадағы 30 жылдық мерейтойына орай концерт берді. Концерт Мәдениет және ақпарат министрлігінің қолдауымен өтіп, құрметті қонақтардың қатарында ҚР Мәдениет және ақпарат министрі Аида Балаева болды.

Майра Мұхамедқызы көрермендерге әлемдік және ұлттық репертуардағы туындылардан тұратын бірегей бағдарлама ұсынды. Опера саңлағының орындауында Рихард Штраус, Ференц Лист, Петр Ильич Чайковский сынды ұлы композиторлардың операларынан ариялар, сондай-ақ концертке ерекше ұлттық бояу берген қазақ авторларының шығармалары шырқалды. Дирижерлер Абзал Мұхитдин және Мәди Өмірзақтың жетекшілігіндегі "Астана Опера" симфониялық оркестрінің және хорының сүйемелдеуімен өткен концерт оның көп жылдық шығармашылығының жанды көрінісіне айналды.

Майра Мұхамедқызының Теміржан Ержановпен бірге орындаған "Olieb, solang duliebenkannst" композициясы көрермендердің зор ықыласына бөленді. Опера әншісінің Жорж Бизе, Шарль Гуно және Джузеппе Вердидің операларынан арияларды тебірене орындауы оның эмоциялық тереңдігін және әртістік шеберлігін айқын көрсетті. Сондай-ақ симфониялық оркестр мен хордың сүйемелдеуімен орындалған Карл Орфтың "Кармина Бурана" шығармасының "O Fortuna" үзіндісінен кейін де көрермендер ду қол шапалақ жаудырды. 

Майра Мұхамедқызының мансап жолы – бұл тек сахнадағы 30 жыл ғана емес, бұл өнерге деген адалдықтың 30 жылы. Қазақстан Республикасының еңбек сіңірген әртісі, көптеген сыйлықтардың лауреаты және беделді марапаттардың иегері ретінде ол бірнеше жыл бойы қазақ опера өнерін әлемдік аренада таныстырды. Ол айрықша шеберлігі, жарқын харизмасы және өз ісіне деген адалдығының арқасында Қазақстанда ғана емес, одан тыс жерлерде де көрермендердің махаббаты мен ықыласына ие болды. 

Режиссері Михаил Панджавидзе болған концертке театрдың балалар хоры, "Астана Операның" жетекші балет  солистері Әнел  Рүстемова, Олжас Тарланов, Диас Құрманғазы, әйгілі қазақстандық әртістер  Ораз Мұхамедьяр (тенор), Жұмабек Қаңтарбаев (тенор), Айбек Қанатбек (баритон), Рамина Сатыбалды және тағы басқалары қатысты.

Салтанатты кеш "Домалақ Ана" операсынан той көрінісімен аяқталды.