Алматылық оқушылар 1 қыркүйекте алғашқы қоңырауға бармайды, деп хабарлады қала әкімінің орынбасары Әсем Нүсіпова. 

Ол 1 қыркүйек демалыс күніне тұспа-тұс келетінін атап өтті. 

"1 қыркүйек демалысқа тұспа-тұс келеді, 2 қыркүйекте алғашқы қоңырау соғылады", – деді әкімнің орынбасары.

Сағат 14.52, 23 тамыз. Жаңалық толықтырылды: 

Оқу-ағарту министрлігінің баспасөз хатшысы Мереке Амангелдіқызы республиканың барлық өңірінде, оның ішінде Алматы қаласында да 1 қыркүйекте "Мектебім – мейірім мекені" тақырыбында салтанатты шара өтетінін хабарлады. 

Оның хабарлауынша, 2024-2025 жаңа оқу жылында 345 мың бірінші сынып оқушысы алғаш рет мектеп партасына отырады. Олар үшін 1 қыркүйекте "Мектебім – мейірім мекені" тақырыбында салтанатты шара өтеді.

2 қыркүйекте – жаңа оқу жылының бірінші күні – "Менің Отаным – Қазақстан" тақырыбында Бірыңғай сынып сағатымен басталып, әрі қарай сабақ кестесіне сәйкес жалғасады. 

Оқи отырыңыз: 1 қыркүйек – жексенбі: Қазақстанда алғашқы қоңырау күні ауыса ма?