Қазақстанда жалған шетел валютасын өткізу фактілері жиілеп кетті, деп хабарлады Қаржылық мониторинг агенттігі.

Ведомство мәліметінше, Алматы қаласында жалған 100 долларлық купюраларды сатумен айналысқандар тобы анықталды. Қылмысқа қатысушылардың бірінің тұрғылықты жерін тінту барысында 149 дана (14 900 АҚШ доллары) жалған доллар табылды.

Құқық бұзушылар ұсталып, сот оларға қамауда ұстау түріндегі бұлтартпау шарасын санкциялады.

"Сонымен қатар Батыс Қазақстан облысында ҚМА полициямен бірлесіп жалған валютаны өткізу фактісі анықтады. Бір топ адам Орал қаласындағы лотерея клубтарының бірінде жалған 25 000 АҚШ доллары мен 10 000 еуро өткізген деген күдікке ілінді. Күдіктілер бәс тігу мақсатында бұл қаражатпен шоттарын толықтырған. Жалған ақшаны сатушыға қатысты соттың санкциясымен "қамауда ұстау" түріндегі бұлтартпау шарасы таңдалды. ҚПК-нің 201-бабы тәртібіндегі өзге де ақпарат жария етілуге жатпайды", – делінген хабарламада.

ҚМА мәліметінше, жыл басынан бері Қазақстан аумағында айналымнан 1 060 жалған банкнот тәркіленді, оның ішінде ұлттық валютада 647 000 теңге сомасына 141 дана, 90 400 АҚШ долларына 905 купюра, 2 000 еуроға 4 купюра, 1 000 юань сомасына 10 купюра. Алынған жалған банкноттардың жалпы сомасы 43 млн теңгеден асады.

Оқи отырыңыз: ІІМ мен ҚМА қылмыстық жолмен алынған кірістерді заңдастырумен күресу үшін бірігеді

Жалпы, биыл жалған купюраларды жасап, өткізгені үшін сегіз адам 5 жылдан 6 жылға дейінгі мерзімге бас бостандығынан айырылды.

"Құрметті азаматтар! Жалған ақша жасаушылардың құрбаны болмас үшін жақсы бағам бойынша айырбастауды ұсынса да, бейтаныс адамдарға ақша айырбастамаңыз және валютаны "делдалдардан" сатып алмаңыз. Егер сіз жалған купюраны тапсаңыз, оны сатуға тырыспаңыз. Жалған банкноттар табылған жағдайда дереу ҚМА-ның аумақтық департаменттеріне жүгінуге шақырамыз", – делінген ведомство хабарламасында.