27 қазанда "Браконьер" жедел-профилактикалық іс-шарасын өткізу барысында Балқаш ауданының Құйған ауылы маңында полицейлер көрші Жамбыл облысының 45 жастағы тұрғынын ұстады, деп хабарлады Балқаш аудандық полициясының баспасөз қызметі.

Ер адам моторлы қайықпен және тыйым салынған моножіпті торлармен балық аулаған.

"Тінту кезінде құқық бұзушыдан 50 келіден астам көксерке, сонымен қатар заңсыз аулау құралдары табылды. Күдіктіге қатысты балық ресурстарын заңсыз өндіру фактісі бойынша сотқа дейінгі тергеу басталды. Мемлекетке келтірілген залал 425 844 теңгені құрайды", – деп атап өтті Балқаш аудандық полициясының бастығы Айдар Умаров.

Оқи отырыңыз: Каспий жағалауында 150-ден астам итбалықтың өлексесі табылды

Тәркіленген балық кейіннен сату және мемлекет пайдасына түскен қаражатты аудару үшін қабылдау пунктіне өкізілді.