Қазақстан футбол федерациясындағы тағайындау: Тоттенхэм тәжірибесі нәтиже бере ме?

Қазақстан футбол федерациясының бас хатшысы лауазымына ағылшынның Tottenham Hotspur клубының бұрынғы футбол директоры Скотт Мунн үміткер. Бұл кандидатура қазақстандық футболдың қазіргі даму кезеңіне қаншалықты сәйкес келетіні жайында Qazaq Expert Club шақырылған сарапшысы, футбол функционері Алтай Даумов пікір білдірді.

"Халықаралық клубтарда жұмыс тәжірибесі бар шетелдік мамандарды тағайындау көбіне жүйені күшейту қадамы ретінде қабылданады. Tottenham Hotspur немесе City Football Group деңгейіндегі құрылымдарда жұмыс істеу жылдам прогресс күтуге негіз береді. Алайда іс жүзінде тәжірибенің ауқымы емес, оның нақты жүйенің міндеттеріне сәйкестігі маңызды", – деді Алтай Даумов.

Оның айтуынша, Скотт Мунның кәсіби жолы әртүрлі спорттық құрылымдардағы ұйымдастырушылық жобалардан бастап клуб менеджментіне дейінгі жұмысты қамтиды. Сонымен қатар, оның негізгі басқарушылық тәжірибесі клубтық жүйемен байланысты, ал онда көптеген процестер алдын ала стандартталған.

"Скотт Мунн жағдайында басты мәселе оның кәсіби біліктілігінде емес, жұмыс істейтін контекстінде", – деген Алтай Даумов клубтық және федеративтік басқару модельдерінің айырмашылығына назар аударды. 

"Клубта құрылым айқын, басқару вертикалі түсінікті, қатысушылар шеңбері шектеулі және нақты спорттық мақсаттар бар. Ал федерация – әлдеқайда күрделі экожүйе: оған өңірлер, төрешілік, лицензиялау, мемлекеттік органдармен өзара іс-қимыл және көптеген қатысушыларды үйлестіру кіреді. Клубтық модельде қалыптасқан тәжірибе мұндай деңгейге әрдайым тікелей бейімделе бермейді. Бұл құзыреттіліктің жетіспеушілігі туралы емес, басқару тәжірибесінің басқа институционалдық ортада қолданылуы туралы мәселе", – деп түсіндірді ол.

Сарапшының пікірінше, жергілікті контекст те маңызды рөл атқарады. Қазақстанда спорт жүйесі көбіне мемлекеттік қатысумен, өңірлік ерекшеліктермен және қалыптасқан басқару тәжірибелерімен тығыз байланысты.

"Мұндай жағдайда тек стратегиялық ойлау ғана емес, жүйенің әртүрлі деңгейлерімен тиімді коммуникация құра білу маңызды. Тілдік және мәдени контекст формалдылық емес, толыққанды басқару құралына айналады. Мұндай тағайындаулардың тиімділігі халықаралық тәжірибенің жергілікті сараптамамен қаншалықты толықтырылатынына байланысты. Ішкі процестерді жақсы түсінетін мамандар реформалар мен стратегиялық бастамаларды тұрақты жүзеге асыруға қабілетті. Сонымен қатар елімізде көшбасшылық рөлді атқара алатын мықты кадрлар да бар", – деп қорытындылады сарапшы.

Автордың пікірі редакцияның ұстанымына сай келмеуі мүмкін.