Биыл 14 жаңа халықаралық әуе бағытының ашылуы күтілуде

Мемлекет басшысының қабылдауында болған премьер-министрдің орынбасары Роман Скляр Қазақстанда "ашық аспан" жүйесін құру бойынша атқарылған жұмыстар туралы баяндады.

Биыл Катар, Польша, Оман, Беларусь, Малайзия, Румыния, Біріккен Араб Әмірліктері, Кувейт секілді елдердің танымал әуе компаниялары 14 жаңа әуе бағытын ашады деп жоспарланып отыр. Сондай-ақ, Швейцария, Оңтүстік Корея, Сингапур, Латвия, Литва елдеріндегі авиация саласының басшылығымен келіссөздер жүргізіліп жатыр.

"Роман Скляр мемлекет басшысының 2019 жылғы тапсырмалары орындалып, нәтижесінде жаңа 12 бағыт – Елордадан Прагаға, Ұлан-Батырға және Токиоға рейстер ашылғанын хабарлады" делінген Қазақстан республикасы президентінің ресми сайтында.

Оқи отырыңыз: Әуе билетінің бағасы неге жиі құбылады? Ұшақ жолаушылары тағы нені білуі тиіс?

Өз кезегінде Қасым-Жомарт Тоқаев мүдделі мемлекеттермен арадағы әуе қатынастарын кеңейтуді, сондай-ақ, Қазақстанның негізгі әуежайлары арқылы өтетін жүк тасымалының көлемін ұлғайтуды тапсырды.

Президент авиация саласындағы бәсекелестікті арттырудың маңыздылығын атап өтіп, оның жолаушыларға қызмет көрсету сапасына және азаматтық авиацияны дамытуға оң әсер ететінін айтты.