Көп қабатты еңселі үйдің ауласында балалар алаңсыз ойнап жүр. Арасында Ақерке, Мирас, Диас және Әли де бар. Балаларына қуана көз тастап тұрған Жазира осы сәтті 12 жыл күткен еді.
Жазира мен Ардақ Әбжаппаровтар Ақсай 1 ықшам ауданынан 39 шаршы метрлік бір бөлмелі пәтер алды. Тұрғын үй құрылыс жинақ банкі дәл 1 маусым балалар күні мерекесінде кілтін табыстаған болатын. Жазираның айтуынша, бұл – отбасы үшін керемет сыйлық болды.
– Біз құжаттарымызды жинастырып, банкке тапсырған бір айдың ішінде пәтер қарастыруға рұқсат алдық. Сосын отбасымыздың табысына қарай ыңғайлы пәтер іздедік. Ең бастысы "Бақытты отбасы" бағдарламасымен ұсынылған пәтерлердің ішінен таңдау құқы берілді. Біз соған шексіз риза болдық, – дейді Жазира.
Алматы қаласында көпбалалы отбасылар үшін жалға пәтер табу қиын. Өйткені балалар шулап мазамызды алады деген сылтаумен үйдің қожайындары жолата бермейді. Олар аядай бір бөлмені 25 мың теңгеге жалға алып тұрған.
Жылдар бойы төзіп келген қиындық отбасы үшін енді артта. "Бақытты отбасы" бағдарламасымен қол жеткізген пәтер мектепке де, балабақшаға да жақын.
Ардақ пен Жазираның балалары жаңа үйге тезірек көшіп келер күнді асыға күтеді. Өздеріне тиесілі ойын алаңында армансыз ойнасақ дейді. Әзірге жөндеу жұмыстары бітпеген үйдің еденіне сурет салып жүр.
Жазираның мамандығы – әлеуметтанушы. Жары Ардақ жекеменшік компанияда жүргізуші болып жұмыс істейді. Сәуір айынан бері төрт балаға әлеуметтік көмек алады. Жаңа үйге қоныс аударған соң, Жазира екі кішкентайын балабақшаға орналастырып, мамандағына сай жұмыс шықпақшы.
"Бақытты отбасы" бағдарламасына қатысу үшін өтініштер бір ай бойы http://www.baqytty-otbasy.kz порталында онлайн-режимінде қабылданды. Одан кейін, қала әкімдігі құжаттарды тексеріп, жеңілдетілген несиеге үміткерлер тізімін бекітеді. Төлем қабілеттілігін анықтау мақсатында Тұрғын үй құрылыс жинақ банкіне жолдама береді.
Қазіргі сәтте тұрғын үй сертификатын 97 көпбалалы отбасы алды. Тұрғын үй құрылыс жинақ банкі 340 өтінішті қабылдады. Оның ішінде 232 отбасы өздеріне баспана тауып, құжаттарын рәсімдеп жатыр. Ал 79 отбасына 1,1 млрд теңге көлемінде несие берілді.
"Бақытты отбасы" бағдарламасы бойынша займдар жаңа үйлерден пәтер сатып алуға беріледі. Несиенің ең жоғары сомасы – 15 млн теңге.
