Активтерді қайтару жөніндегі жұмыс шеңберінде арнаулы мемлекеттік қор бүгінде 177 миллиард теңгеден астам ақшалай қаражатпен толықтырылды, деп хабарлайды Бас прокуратураның активтерді қайтару жөніндегі комитеті.

Тізілім субъектілерімен жасалған келісімдердің нәтижелері бойынша шамамен 147 млрд теңге, процестік келісімдері бойынша 19 млрд теңге, активтерді өткізуден 6 млрд теңгеден астам, соттардың шешімдері бойынша шамамен 5 млрд теңге және жылжымайтын мүлікті жалға беруден 165 млн теңгеден астам қаражат түсті.

"Өткізілген активтердің ішінде екі вилла, әкімшілік ғимарат, тұрғын үй, пәтер, жер учаскесі және екі сәнді автокөлік бар. Активтерді табысты өткізудің бір мысалы болып Алматы қаласындағы жер учаскесі табылады, ол "Заңсыз иемденілген активтерді мемлекетке қайтару туралы" Заң субъектісінен 176 млн теңге бағамен қабылданып, 657 млн теңгеге, яғни бастапқы бағалау құнынан төрт есе артық сатылған", – делінген хабарламада.

Оқи отырыңыз: Көкшетауда 70 миллион теңгеге заңсыз берілген жер телімі мемлекетке қайтарылды

Сонымен қатар тізілім субъектілерімен келісімдер бойынша арнаулы мемлекеттік қорды 150 млрд теңгеден астам сомаға ақшалай қаражатпен қосымша толықтыру күтілуде.

Барлық қайтарылған ақша қаражаты елдің әлеуметтік және экономикалық жобаларын іске асыру үшін пайдаланылатын болады.

Бұл бағыттағы жұмыс жалғасып жатыр.