2024 жылғы 25 қарашадағы жағдай бойынша 12 835 азаматқа зиянды еңбек жағдайларында ұзақ уақыт жұмыс істеген адамдарға арналған арнаулы әлеуметтік төлем тағайындалды, деп хабарлайды Еңбек және халықты әлеуметтік қорғау министрлігі.

Аталған төлемді тағайындауға жалпы 13 673 адам өтініш білдірген.

"Екі көзден төленетін арнаулы әлеуметтік төлемге (республикалық бюджет және Бірыңғай жинақтаушы зейнетақы қоры) 3 151 адам жүгінді, оның ішінде 3 037 адамға тағайындалды. Төрт қаржыландыру көзінен берілетін АӘТ (республикалық бюджет, Бірыңғай жинақтаушы зейнетақы қоры, жұмыс беруші және өмірді сақтандыру ұйымы) тағайындауға 10 522 адам өтініш білдіріп, оның 9 798-іне тағайындалған", – делінген хабарламада.

Оқи отырыңыз: Қазақстанда 256 мыңнан астам адам жұмысынан айырылуына байланысты төлем алды

Министрліктің мәліметінше, 351 азамат сақтандыру компаниясымен зейнеткерлік аннуитет шартының жасалуын күтуде, 119 азамат СМС хабарламаға жауап бермеген. Міндетті шарттарды орындамағандықтан, 368 өтініш берушіге АӘТ тағайындаудан бас тартылды.

"Өңірлер бойынша арнаулы әлеуметтік төлемдерді алуға өтініш білдіргендердің ең көп саны Қарағанды ​​(2 көзден – 538 адам, 4 көзден – 1 835 адам), Қостанай (2 көзден – 340 адам, ал 4 көзден – 1 151 адам) және Шығыс Қазақстан (2 көзден – 283 адам, ал 4 көзден – 1 173 адам) облыстарында тіркелген", – делінген хабарламада.